भक्तपुरमा खुल्ला लोक नृत्य संग्रामकाे तयारी व्यापक
भक्तपुर । भक्तपुरको सूर्यविनायकस्थित एजे सेकेण्डरी स्कूलले लोक नृत्य संग्राम गर्ने भएको छ । त्यसको तयारी व्यापक बनाएकाे छ । संग्राममा सहभागी हुनेहरूकाे संख्या बढ्दो छ ।
विद्यालयले राष्ट्रिय वाल दिवस२०८१ को अवसर पारेर मौलिक कला संस्कृतिको संरक्षण र संस्कृतिलाई नयाँ पुस्तामा पुस्तान्तरण गर्न साे नृत्य संग्राम गर्न लागिएको विद्यालयका प्रिन्सिपल कृष्णराम दुवालले बताए ।
उनले लोकनृत्य तथा सांस्कृतिक भेषभुसालाई नयाँ पुस्तामाझ फरक तरिकाबाट आत्मसात गराउने उद्देश्यले यही भदौ २८ गते संग्राम गर्न लागिएको उल्लेख गरे ।
संग्राममा सहभागी हुने प्रतियोगीहरुले कुनै पनि लोकभाका र गीतमा एकल लोक नृत्य प्रस्तुत गर्ने पर्ने नियम बनाइएको छ। प्रतियोगीहरुले पूर्ण रूपमा लोकभाकामा सांस्कृतिक भेषभुषामा लोकनृत्य मात्र गर्नुपर्ने छ भने आधुनिक नृत्य गर्न नपाइने गरि संग्रामकाे तयारी थालिएको छ।
संग्राममा कुनै पनि विद्यालयबाट कक्षा १०सम्म अध्ययनरत नृत्यप्रेमी छात्रछात्राहरूका लागि खुला गरिएको र यसले प्रतिभाशाली नृत्य कलाकारहरूलाई आफ्नो कलाकौशल प्रदर्शन गर्ने अवसर प्रदान गर्ने विश्वास विद्यालयले लिएको छ ।
प्रतियोगिता २ चरणमा हुनेछ । प्रथम चरणमा सहभागीहरुलाई आआफ्नो खुबी देखाउन ४० सेकेण्डको मौका दिइनेछ र त्यसबाट छनौट भएका प्रतियोगीहरुलाई मात्रै संग्रामकाे अर्को चरणमा समावेश गराइने छ । दुवै चरणमा आयोजकले उपलब्ध गराएको गीतमा प्रतियोगीहरुले पालैपालो आआफ्नो नृत्य प्रस्तुत गर्नुपर्नेछ । विजेताहरूलाई नगद पुरस्कार,प्रमाणपत्र, ट्रफी र गिफ्ट हाय्म्परको व्यवस्था गरिएको छ । प्रतियोगितामा भागदलिन इच्छुक छात्रछात्राहरूले विद्यालयको आफ्नो परिचयपत्र र विद्यालयको आधिकारीक चिठी सहित प्रति व्यक्ति रू ५०० दर्ता शुल्क बुझाई संग्राममा भाग लिन सक्नेछन् ।
