भक्तपुर । स्क्र्याबल क्लब पोखराको तत्वावधानमा स्क्र्याबल क्लब भक्तपुरले चौथो जिल्लास्तरीय स्क्र्याबल च्याम्पियनशिप २०२४ आयोजना गर्दैछ । स्क्र्याबल क्लबको भक्तपुर जिल्ला संयोजक तथा गोल्डेन गेट ईङ्गलिश सेकेण्डरी स्कूलका प्रिन्सिपल तथा कोफाउण्डर सिङ्ग लामाका अनुसार यही २०८१ आश्विन २ गते मध्यपुरस्थित एड्भान्स्ड एकेडेमीमा उक्त कार्यक्रम आयोजना हुँदैछ जसमा भक्तपुरका करीब १० विद्यालयहरुको सहभागिता रहनेछ ।
कार्यक्रममा सहभागी प्रत्येक विद्यालयबाट २/२ जना स्कूल च्याम्पियनहरुले प्रतिस्पर्धा गर्नेछन् र उक्त प्रतिष्पर्धाबाट जम्मा ४ जना जिल्ला च्याम्पियनहरु छानिएर २०८१ कार्तिक ९ र १० गते गुल्मी, तम्घासस्थित श्री सिद्धार्थ माध्यमिक विद्यालयमा आयोजना हुने दशौं राष्ट्रिय स्क्र्याबल च्याम्पियनशिप २०२४ मा प्रतिस्पर्धा गर्नेछन् । राष्ट्रिय च्याम्पियनशिपबाट छानीएका खेलाडीहरुले अन्तर्राष्ट्रिय स्क्र्याबल च्याम्पियनशिपमा प्रतिस्पर्धा गर्ने मौका पाउनेछन् ।
संयोजक लामाका अनुसार भक्तपुरमा सन् २०१८ मा महाकालिस्थान, भक्तपुरस्थित गोल्डेन गेट ईङ्गलिश सेकेण्डरी स्कूलले प्रथम जिल्लास्तरीय स्क्र्याबल च्याम्पियनशिप आयोजना गरेपछि स्क्र्याबलको लहर सुरु भएको हो । त्यसपछि सन २०२२ मा माउन्ट भ्यू ईङ्गलिश बोर्डिङ स्कूल, बालकोट र २०२३ मा विनायक शिक्षा निकेतन, मध्यपुर ठिमीले दोस्रो र तेस्रो च्याम्पियनशिप आयोजना गरेका थिए भने सन २०२५ को पाँचौं स्क्र्याबल च्याम्पियनशिप भने नवरत्न लाईफ स्कूल, ध्यपुरले आयोजना गर्ने तय भएको छ ।
