भक्तपुर । नेपाल क्रान्तिकारी महिला संघ चाँगुनारायण नगरपालिकाकाे आयाेजनामा तीज विशेष कार्यक्रम तथा वृहत् महिला भेला भएकाे छ ।
कार्यक्रममा नेमकिपाका सचिव एवम् संघीय संसद प्रेम सुवालले संस्कृति राम्रो कामका लागि भएकाे बताए । उनले नेपालका कम्युनिस्ट पार्टीहरूले जनताको हितका लागि काम नगरेकाे बताए । उनले एमाले, माओवादी, नेकपा एस जस्ता कम्युनिस्ट पार्टीहरू काँग्रेसकै पिछलग्गु भएकाे बताउँदै भने, `एमाले, माओवादी, नेकपा एस नेपाली काँग्रेसले खेलाउने मुसाजस्तै भएका छन् । ´
कार्यक्रममा उनले समाजलाई राम्रो बनाउनका लागि महिला शिक्षामा जाेड दिइन् । उनले बुहारीलाई पनि छाेरीकाे जस्तै व्यवहार गर्नुपर्नेमा जाेड दिए । सांसद सुवालले बढ्दाे आधुनिकतासँगै विभिन्न विकृति र विसंगति देखिएकाेमा सचेत हुन आग्रह गरे ।
शासक दलहरूले ख्वप विश्वविद्यालय सञ्चालनका लागि स्वीकृति नदिँदा कामदार जनताका सन्तान शिक्षा र स्वास्थ्यमा पछि रहेको उल्लेख गर्दै शासक दलहरूले गरेका विभिन्न भ्रष्टाचार काण्डविरूद्व गीतसंगीतमार्फत सचेतना फैलाउनुपर्नेमा जाेड दिए । उनले सिंहदरबारमा गएका शासक दलहरू नै बेइमानी र भ्रष्टाचारी भएकाले जनताको दु: ख नघटेकाे बताए ।
भेलामा वागमती प्रदेश सभा सदस्य सृजना सैंजूले कला, संस्कृतिलाई समृद्ध बनाउने काममा महिलाहरूले गरिरहेको उल्लेख गर्दै तीजलाई प्रगतिशील तवरले मनाउनुपर्ने र संस्कृतिमा विकृति भित्र्याउन नहुने बताइन् । उनले चाडपर्वलाई रचनात्मक तवरले मनाउनका लागि आग्रह गरिन् ।
वागमती प्रदेश सांसद गीता काफ्लेले नेमकिपाले देश र जनताकाे हितमा काम गरिरहेको चर्चा गर्दै संस्कृतिलाई समेत रचनात्मक तवरले उपयाेग गर्दै आइरहेकाे बताइन् । उनले पछिल्लाे समयमा तीजमा विभिन्न जातजातिकाे अन्तरघुलन हुनु सकारात्मक भएको बताइन् ।
कार्यक्रममा नेमकिपाका न्हुच्छेभक्त फाेँजू, चाँगुनारायण नगरपालिका वडा नं. ९ का वडा अध्यक्ष गणेश त्यात, महिला सदस्य कमला गिरि र सानुमाया लागेजूलगनयतले तीजकाे रचनात्मक उपयोगिताबारे चर्चा गरेका थिए ।
