भक्तपुर । भक्तपुरको बासु माध्यमिक विद्यालयले निःशुल्क रुपमा सूचना प्रविधि औद्योगिक प्रशिक्षार्थी कार्यक्रम सञ्चालन गर्ने भएको छ ।
व्यासीस्थित बासु माविले प्रि–डिप्लोमा तहको सूचना प्रविधि औद्योगिक प्रशिक्षार्थी कार्यक्रम निः शुल्क सञ्चालन गर्ने भएको हो ।
सो कार्यक्रमबारे विद्यालयमा आयोजित छलफल कार्यक्रममा विद्यालयले सो विषय निःशुल्क अध्यापन हुने जनाएको छ । छलफलमा सहभागीहरु स्थानीय बुद्धिजीवी, जनप्रतिनिधि, शिक्षाप्रेमी तथा समाजसेवीहरुले शिक्षालाई प्रविधिसँग जोड्नका लागि र प्रविधिलाई सीपसँग जोड्न बासु माविको सो प्रयास उपयोगी र देशको लागि सान्दर्भिक हुनेमा जोड दिए ।
विद्यालयका प्रधानाध्यापक अम्बिका न्याइच्याईले शिक्षाको उद्देश्य पूरा गर्न र शैक्षिक बेरोजगारीको समस्या समाधान गर्नका लागि विद्यालयले प्राविधिक शिक्षामा जोड दिएको जनाइन् । उनले विद्यार्थीलाई श्रम र उत्पादनसँग जोडी उद्यमी बनाउन सहयोग गर्नका लागि उक्त विषयको अध्ययन गराउन लागेको बताइन् ।
कार्यक्रममा भक्तपुर नगरपालिका वडा नं २ का वडाध्यक्ष हरिप्रसाद बासुकलाले विद्यालयले सञ्चालन गर्न लागेको औद्योगिक प्रशिक्षार्थी कार्यक्रम शिक्षाको क्षेत्रमा कोशेढुंगा सावित हुने जनाउँद्यै शिक्षालाई उत्पादन श्रमसँग जोड्न मद्दत पुग्ने बता उ । उनले उत्पादन श्रमसँग गाँसिने शिक्षाले प्रशिक्षार्थीहरुमा श्रमप्रति माया बढ्ने र हातमा सीप भएको व्यक्ति बेरोजगार भएर बस्न नपर्ने उल्लेख गर्दै बासु माविको उक्त कार्यक्रम प्रभावकारी हुने समेत बताए ।
औद्योगिक प्रशिक्षार्थी तालिममा सहभागी हुने विद्यार्थीहरुले अध्ययनकै क्रममा उद्योगमा कामसँगै आम्दानी पनि गर्न सक्ने हुँदा न्यून आर्थिक अवस्थाका विद्यार्थीहरुलाई कार्यक्रमले सहयोग गर्ने उनको भनाइ थियो ।
कार्यक्रमका शिक्षासेवी गणेश प्रसाद सुवालले बासु माविमा युग र नयाँ पुस्ता सुहाउँदो नयाँ कार्यक्रम सञ्चालन हुन लागेकोमा खुसी व्यक्त गरे। उनले निःशुल्क रुपमा अध्ययन गर्न सकिने सो कार्यक्रमलाई व्यापक जनताहरुमा पुर्याउन सम्पूर्णले महत्वपूर्ण भूमिका खेल्नुपर्नेमा जोड दिए ।
ख्वप ईन्जिनियरिङ कलेजमा सूचना तथा सञ्चार विषय अध्यापनरत ई. नरेश खत्रीले अहिलेको समय सूचना प्रविधि र कृत्रिम बौद्धिकताको चरणमा प्रवेश गरिसकेको हुँदा सबैजनाले सूचना प्रविधिबारे ज्ञान लिइ राख्नुपर्ने बताए ।
कार्यक्रममा विद्यालयका सहायक प्रधानाध्यापक रविलाल प्रधान, डिप्लोमा तह औद्योगिक प्रशिक्षार्थी कार्यक्रमका विषयमा डिप्लोमा इन कम्प्युटर ईन्जिनियरिङ कार्यक्रमका संयोजक रमेश प्रजापतिले सो विषयको वर्तमान अवस्था र भविष्यबारे प्रस्तुतिकरण गरेका थिए ।
तालिममा एसएलसी उतीर्ण वा एसइइमा न्यूनतम ई ग्रेड हासिल गरेका विद्यार्थीहरु सहभागी हुन सक्ने प्रावधान निर्धारण गरिएको छ ।
विद्यालयले सो तालिम लिन इच्छुक र योग्यता पुगेका व्यक्तिहरुलाई आवेदन दिन समेत अनुरोध गरेको छ । तालिमपछि प्रशिक्षार्थीहरुले सूचना प्रविधि क्षेत्रमा काम गरिरहेका प्रतिष्ठित उद्योगरकम्पनीहरुमा २० महिना न्यूनतम तलबसहित काम गर्ने अवसर समेत पाउने विद्यालयले जनाएको छ ।
तालिममा भर्ना हुन यहि असोज २ गते मंगलबारसम्म आवेदन दिन सकिने छ भने असोज ६ गते शनिबार लिखित परीक्षा तथा अन्तर्वार्ता हुने विद्यालय स्रोतले जनाएको छ।
