भक्तपुर । अविरल वर्षाको कारण भक्तपुरका विभिन्न ठाउँमा पहिरो गएको छ ।
पहिरोले भक्तपुरको चाँगुनारायण नगरपालिका, सूर्यविनायक नगरपालिकाका विभिन्न वडाका टोलहरु प्रभावित भएका छन् । चाँगुनारायण नगरपालिका वडा नंं ९ ताथलीको देवी मावि अगाडिको बाटोमा पहिरो गएको छ ।
गचा(तल्लो सौडोल) देखि खगाङ टोल पुग्ने सडक अन्तर्गत देवी माविको गेट अगाडिको बाटोमा पहिरो गएको हो । उक्त सडकमा गएको पहिरोका कारण थने(न्हेम्हाफुकी टोल, खड्का टोल, कार्की टोल) जाने सडक अवरुद्ध भएको छ ।
यस्तै देवी माविको उत्तरपश्चिमको शौचालय नजिकै पनि पहिरो गएको छ । यस्तै सोही वडाको खगाङस्थित माझी भैरब मन्दिरसँगैको परिसर पनि भासिएको छ ।
पहिरो गएपछि देवी माविको गेट अगाडि स्थानीयले प्लाष्टिकले छोपेर जोखिम कम गर्ने उपाय गरेका छन् ।
अविरल पहिरोले ठाउँठाउँमा जोखिम समेत बढेको छ ।
