भक्तपुर । भक्तपुरको ताथली नाला सडक कालाेपत्रे गरिएको महिना दिन नहुँदै बिग्रन थालेको छ । गरिएको कालाेपत्रे उप्किए पनि त्यसकाे मर्मतका लागि सम्बन्धित निकायले दबाब नदिँदा नेपाल कम्युनिष्ट पार्टी (माओवादी केन्द्र) चाँगुनारायण नगर समितिले बिग्रेको सडकबारे प्रजिअदेखि नगरप्रमुखकाे ध्यानाकर्षण गराएका छन् ।
चाँगुनारायण नगरपालिका वडा नं. ९ स्थित च्याम्हासिंह- ताथली-नाला सडक खण्ड र वडा नं ४ स्थित चाँगुनारायण-पौवा-साँखु सडक खण्डमा गरिएको कालाेपत्रे उप्किएपछि पार्टीले सम्बन्धित निकायकाे ध्यानाकर्षण गरेकाे हाे ।
विगत लामोसमय देखि स्थानीयहरुले पटक पटक दबाब र आन्दोलन गर्दै भएको कालोपत्रे सडक निर्माण सम्पन्न भएको एक महिना नपुग्दै विभिन्न स्थानहरुमा सडक भत्किएको र खाल्डाहरु भएको हुदा उक्त सडकका लागि नगर समितिले ध्यानाकर्षण गराएकाे समिति अध्यक्ष नरेश खड्काले बताए ।
सडक बिग्रएसँगै ताथलीका स्थानीयले तत्काल सडक मर्मत गर्न माग गरेका छन् ।
