भक्तपुर । तत्कालिन ताथली गाविसका अध्यक्ष जयराम बासुकलाको १९ औं स्मृति सभा भोलि गरिने भएको छ । नेपाल मजदुर किसान पार्टीका इमान्दार कार्यकर्ताको छविका साथै शिक्षासेवी र समाजसेवीको छवि बनाउन सफल उनको १९ औं स्मृति सभा भोलि ताथलीको फैढोकामा गरिने भएको हो ।
सो कार्यक्रम उनको स्मृतिमा स्थापित जयराम स्मृति अक्षय कोष समितिले गर्न लागेको हो । आयोजक समितिले यो वर्ष ताथलीका स्नातकोत्तर तह उत्तीर्ण विद्यार्थीलाई सम्मान गर्ने कार्यक्रम तय गरेको जनाएको छ । स्मृति कार्यक्रममा नेपाल मजदुर किसान पार्टीका अध्यक्ष नारायणमान बिजुक्छेंको प्रमुख आतिथ्यता रहने छ ।
वि.सं.२००९ साल असार ३ गते ताथली वडा नं. ७ को सौडोलमा जन्मिएका उनको मृत्यु वि.सं.२०६२ साउन २४ गते भएको थियो ।
उनी २०३९ र २०४३ सालमा ताथली गाउँ पञ्चायतको प्रधानपञ्च, २०४९ र २०५४ मा ताथली गाविसको अध्यक्षमा निर्वाचित भएका थिए । उनी २०४९ सालमा जिल्ला विकास समिति भक्तपुरको इलाका सदस्यमा निर्वाचित समेत भएका थिए । यसका साथै २०५२ सालमा राष्ट्रिय सभामा उम्मेवार समेत बनेका थिए ।
उदाहरणीय राजनीतिक कार्यकर्ता, शिक्षा प्रचारक र स्वच्छ छविको व्यक्तिको रुपमा रहेका उनले ताथलीको विकासको लागि अविष्मरणीय योगदान दिएका थिए । उनी २०२२ सालमा नेपाल मजदुर किसान पार्टीका बुद्धिकुमार गोसाइँ र हरिभक्त लवजूको माध्यमबाट पार्टी संगठनमा लागेका थिए ।
पार्टी गतिविधि र संगठनका सक्रिय भई विभिन्न राजनीतिक र सामाजिक क्रियाकलापमा अघि बढिरहँदा उनी २०३२ साल र २०४५ सालमा जेलमा समेत परेका थिए ।
‘ताथलीका अभिभावक’, भक्तपुरको ‘पूर्वी भेगका कमाण्डर’का रुपमा स्वीकार्य उनी ‘जनताको आँखामा राख्दा समेत नबिझाउने’ गुणका थिए । उनको सम्झनामा कोषले प्रत्येक वर्ष विभिन्न कार्यक्रम सञ्चालन गर्दै आइरहेको छ ।
