चुनदेवीबाट घलाँते जाने महिन्द्रगल्लीमा फुटेको ढल बनाइदिन भौतिक विकासमन्त्री नारायणकाजी श्रेष्ठको ध्यानाकर्षण गराएपछि ढल त बन्यो। तर, यहाँको बाटो भने बनेन । सूर्यविनायक नपा ५ र ६ को बीचमा पर्ने यो बाटो मेलम्ची खानेपानीले खण्डखण्ड पिच गरेर मान्छे हिँड्नै गाह्रो पर्ने बनाइदिएको छ भने एक खण्ड ६ नं.वडाले ढलान गर्ने जिम्मा लिए पनि हालसम्म आँखा चिम्लेर बसेको छ ।
स्मरणीय छ, यस नगरपालिकाको ५ नं. वडामा एमाले र ६ नं. मा कांग्रेसका वडाध्यक्ष छन् । उनीहरू दुवैले बर्खाभरि हिलो र हिउँदभरि धुलो खुवाएर सर्वसाधारणलाई हैरान बनाएका छन् । पहुँच भएका वा खर्च गर्ने व्यक्ति भएमा एउटै घरमा पनि बाटो पुगेको छ, ढलान भएको छ । तर, सार्वजनिक बाटो बनाउन भने कसैले चासो दिएको छैन । यहाँ पहुँच भएका एकदुईवटा रिसोर्ट जाने बाटो वडाले ढलान गरिदियो । तर, १०\१२ घरबीचमा पर्ने दिनहुँ सयौं मानिस हिँड्ने र गाडी आवतजावत गर्ने बाटो भने आजसम्म ढलान भएन। अहिले त पानीले बाटोभरि चिरा परेकाले गाडी गुड्नसमेत नसक्ने अवस्था छ । कतिपय गाडीसमेत जोतिएर मान्छेले धकेल्नुपर्ने अवस्था छ । तर, जति समाचार निस्के पनि, जति यस्ता टिप्पणी प्रकाशित भए पनि यी ५ र ६ नं. का वडाध्यक्षहरूले
सुन्दैसुन्दैनन्, किन? के यिनलाई जनता नचाहिने हो?
- रत्ननिधि रेग्मी र स्थानीय जनता, चुनदेवी, महेन्द्रगल्ली, भक्तपुर ।
नयाँ पत्रिकामा प्रकाशित पाठक पत्रबाट साभार ।
