भक्तपुर । प्रमुख प्रतिपक्ष दल नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले ताथलीमा ज्येष्ठ नागरिक आश्रम उद्घाटन गरेका छन् ।
उनले सोमबार एक समारोहबीच चाँगुनारायण नगरपालिका वडा नं. ९ ताथलीको ढुंगेमा रहेको छोरीको घर ज्येष्ठ नागरिक आश्रमको उद्घाटन गरेका हुन् । सो आश्रम यसभन्दा अघि पञ्चवती होम्स नामले सञ्चालनमा आएको थियो । सो होम्स सञ्चालकले उक्त आश्रम सञ्चालन गर्न नसकेपछि छोरीको घर ज्येष्ठ नागरिक आश्रम सञ्चालक टोलीले त्यसको जिम्मेवारी लिएको थियो ।
सो आश्रमको जिम्मेवारी लिने समूहले सो आश्रम नि :शुल्क रहेको र सुविधासम्पन्न तथा वातावरणमैत्री समेत रहेको दाबी गरेको छ ।
सोही कार्यक्रममा अध्यक्ष ओलीले ज्येष्ठ नागरिक आश्रमहरुलाई जातको आधारमा भेदभावपूर्ण व्यवहार नगर्न सञ्चालकलाई सचेत गराएका थिए ।
आफू सरकारमा सहभागी भएको बेला सुरु गरिएको ज्येष्ठ नागरिक भत्ता ४ हजार पु¥याउनेलगायतका थुप्रै काम आफूले गरेको बताए । उनले सो कामको जस आफूलाई नै दिनुपर्छ भन्ने मान्यता नलिएको उल्लेख गर्दै देश र जनताको सेवा गरेवापत प्राप्त हुने सन्तुष्टि नै आफ्नो लागि सबै भन्दा ठूलो प्राप्ति र सम्पती भएको चर्चा गरे ।
उद्घाटन समारोहमा सयौं स्थानीयका साथ विभिन्न राजनीतिक दल, सहकारी, समूह, नागरिक समाज, समाजसेवी, उद्योगीहरुको सहभागिता रहेको थियो ।
