भक्तपुर । नेपाली काँग्रेस भक्तपुर जिल्ला सम्मेलनकाे दाैरानमा संघीय सांसद दुर्लभ थापालाई मन्त्री बनाउन माग गरिएकाे छ । जिल्ला सम्मेलनकाे उद्घाटनका क्रममा सहभागी नेपाली काँग्रेसका सभापति शेरबहादुर देउवालाई भक्तपुर क्षेत्र नं २ का सांसद थापालाई मन्त्री बनाउन माग गरेका हुन् ।
सम्मेलनको सफलताको शुभकामना व्यक्त गर्न पाेडियममा उभिएका जयन्द्र खड्का, सुरेन्द्र श्रेष्ठ र जीवन खत्रीलगायतले सांसद थापालाई मन्त्री बनाउन माइकबाटै अनुराेध गरे । ती तीन जनाकाे उक्त मागमा सहभागी काँग्रेस कार्यकर्ताले समर्थन गरि तालीसहित हुटिङ गरेका थिए ।
सुरूमा नेपाली काँग्रेस बागमती प्रदेशका संयाेजकका साथै चाँगुनारायण नगरपालिका वडा नं ५ छालिङका वडा अध्यक्ष जयन्द्र खड्काले चुनावअघिकाे सभामा काँग्रेस सभापति देउवाले थापालाई मन्त्री बनाउने आश्वासन दिएकाे स्मरण गराउँदै भक्तपुरको विकासका लागि र काँग्रेसलाई भक्तपुरको पहिलो पार्टी बनाउनका लागि समेत थापालाई मन्त्री बनाउन जरूरी रहेकाे बताए ।
उनले साे बताउँदा मञ्चकाे मध्य भागमा बसिरहेका प्रमुख अतिथि देउवा भने मुसुमुसु हाँसेका थिए । कार्यक्रमकै अवसरमा चाँगुनारायण नगरपालिकाका नगर प्रमुख जीवन खत्री र मध्यपुर थिमिका नगर प्रमुख सुरेन्द्र श्रेष्ठले पनि पूर्ववक्ता खड्काकै धारणालाई समर्थन गरेका थिए ।
उनीहरूले सांसद थापाकै नेतृत्वमा स्थानीय, प्रदेश र संघीय निर्वाचनमा काँग्रेसलाई पहिलो बनाएकाेले पनि उनलाई संघीय सांसद बनाउनु पर्ने धारणा राखेका थिए ।
