भक्तपुर । भक्तपुरको ताथलीमा गएराति चोरी भएको छ । चाँगुनारायण नगरपालिका वडा नं. ९ ताथलीको सौडोलको एक पसलमा गएराति चोरी भएको जिल्ला प्रहरी कार्यालयले जनाएको छ ।
सौडोल बस्ने ४३ वर्षका ओमकृष्ण थुयाजुको साढे तीन तल्ले पक्की घरको पहिलो तल्लामा घरभित्र पट्टीबाट लगाएको गजबार खोली अपरिचित व्यक्तिले चोरी गरेको खुलेको प्रहरीले जनाएको छ । प्रहरीका अनुसार पसल सञ्चालक थुयाजुले राति ८ बजे पसल बन्द गरेकोमा बिहान ५ बजे पसल खोल्दा मात्र पसल चोरी भएको थाहा पाएका हुन् ।
अपरिचित व्यक्तिहरुले सो पसलको ग्यास चुलो १ थान, नगद ९ हजार रुपैयाँ, ५ हजार रुपैयाँको रिचार्ज कार्ड, क्याप्टेन र पाईलट चुरोट, खानेतेल १० काटुन, बोत्तलको तोरीको तेल, कफी ७ बोत्तल, नेपाल आइस वियर ३ वटा, लुगा धुने साबुन, मिक्स दाल १० केजि, रेडबुल ६ केस, मन्जन, टप बिस्कुट ६ पिस, चिनी ३ केजि, हर्लिक्स ९ पिस, कतारको पैसा रु ५० को १ थान, भित्ते घडी १ थान चोरी गरेका छन् ।
ती सबै गरेर अज्ञात व्यक्तिहरुको समूहले ८२,०५० रुपैयाँ बराबरको सामान चोरी गरेको जनाउँदै सोबारे अनुसन्धान गरिरहेको प्रहरीले जनाएको छ ।
प्रहरीले पछिल्लो समयमा भक्तपुरका विभिन्न ठाउँमा चोरीका घटनामा वृद्धि भएकाले सजगता अपनाउन समेत अनुरोध गरेको छ ।
