भक्तपुर । बिस्कासँगै जोडिएर आउने विषय बनेको छ, इँटा वार, अर्थात् ढुंगा हानाहान । ढुंगा हानाहानका कारण जात्रा नै बदनाम हुने गरेको छ ।
यो वर्षको बिस्काको सुरुवातमै पनि ढुंगा हानाहान भएको छ । गत चैत २७ गते सुरु भएको बिस्काको दिन भैरबको रथ तानेर दत्तात्रय पुर्याएपछि ढुंगा हानाहान भएको थियो । सोही आरोपमा प्रहरीले १० जनालाई पक्राउ गरी आवश्यक कारबाही थालेको छ ।
आज बिस्काको अन्तिम दिन, आज जात्रा भैरबको रथ तानेर बिस्का जात्रा विर्सजन गर्ने प्रचलन छ । सोहीस् अनुसार अहिले रथ तान्ने आवश्यक तयारी चलिरहेको छ ।
यसरी जात्राको तयारी भइरहँदा भक्तपुरबासीमा भने छुट्टै शंका छ, आज पनि कतै अस्तिजस्तै ढुंगा हानाहान त हुने हैन?
ढुंगा हानाहानका कारण बदनाम भएको बिस्काको अन्तिम दिन आज पनि ढुंगा हानाहान हुने सम्भावना प्रवल रहेको धेरैको अनुमान छ । ‘अस्तिको बदला लिनका लागि भए पनि आज ढुंगा हानाहान हुने सम्भावना छ ,’ तौमढीमा जात्रा हेर्न बसेका एक स्थानीयले भने ।
स्थानीयको मात्र नभएर प्रहरी प्रशासनले पनि जात्रामा अराजक र उच्छृङ्खल गतिविधि हुने अनुमान गरेको छ । सोही कारण प्रहरीले आजका लागि विशेष सुरक्षा व्यवस्था गरेको प्रहरीले जनाएको छ ।
जात्रामा हुनसक्ने हुलहुज्जत, दंगादेखि इँटा वारसम्मलाई ध्यानमा राखी प्रहरीले विशेष सुरक्षा व्यवस्था गरेको छ । जिल्ला प्रहरी कार्यालय भक्तपुरका एसपी प्रजित केसीले जात्राको अन्तिम दिनका लागि बर्दिधारी ७४९ प्रहरी, एकसय सिभिल, सशस्त्र प्रहरीका ६ सय ३० जना भक्तपुरका विभिन्न ठाउँमा तैथान गरिएको बताए ।
उनले ठाउँठाउँमा रहेका सिसिक्यामेरामार्फत् विशेष निगरानी समेत गर्ने जनाए ।
