सत्यराम कासिछ्वा
भक्तपुर, २७ जेठ । भक्तपुरको पारागन एकेडेमी स्कुलमा निर्वाचन भएको छ ।
भक्तपुर कमलविनायक स्थित सो विद्यालयले विद्यार्थीहरुको नेतृत्व क्षमता विकास गराउन र स्थानीय निर्वाचनको प्रक्रिया बारे जानकारी दिन स्कुल क्याप्टेन छनोट गर्न सो निर्वाचन गरेको हो ।
उक्त निर्वाचनमा क्याप्टेनको उम्मेदवारमा २, सहायक क्याप्टेनको उम्मेदवारमा ३, एल्लो हाउसबाट ९, ग्रीन हाउसबाट ९, रेड हाउसबाट १५ तथा ब्लु हाउसबाट ११ गरी जम्मा ४९ जनाको उम्मेदवारी परेको छ ।
निर्वाचन परिचालन समितिले १ जना स्कुल क्याप्टेन, १ जना सहायक क्याप्टेन प्रत्येक हाउसबाट ३/३ जनाको प्रतिनिधित्व गराउने गरी १४ सदस्यको टीम बनाउने भएको छ ।
निर्वाचनमा विद्यालयका कक्षा २ देखि १० सम्मका विद्यार्थीहरुको प्रतिनिधित्व गरी क्याप्टेन, सहायक क्याप्टेन, हाउस क्याप्टेन, हाउस सहायक क्याप्टेन तथा हाउस कोषाध्यक्षको निर्वाचन भएको हो । निर्वाचनमा ५ सय ६६ जना विद्यार्थीहरुले आ-आफ्नो मताधिकार प्रयोग गरेका थिए ।
मतदानको व्यवहारिक प्रयोग गरेका उनीहरुले चुनावी प्रक्रिया, उम्मेदवार मनोनयन, दाबी विरोध, उम्मेदवार छनोट प्रक्रिया, मतपत्र र मतदान प्रक्रियामा स्वस्तिक छाप हाल्ने प्रजातान्त्रिक शैलीको ज्ञान दिने विद्यालयले जनाएको छ ।
विद्यालयका शिक्षक रत्नवीर किसिले उक्त निर्वाचन कार्यक्रमको संयोजन गरेका थिए ।
विद्यालयका प्रिन्सिपल पूण्यराम कवांले आज निर्वाचन परिचालन समिति, पूर्व विद्यार्थी, पर्यवेक्षक तथा शिक्षकहरु बसेर मतगणना गर्ने र आइतबार औपचारिक मत परिणाम घोषणा एवं पद तथा गोपनियताको शपथ गराउने कार्यक्रम रहेको बताए ।
उनले विद्यार्थीमा नेतृत्वको क्षमता विकास गर्न प्रत्येक वर्ष गरिरहेको बताउँदै विद्यार्थीहरुमा रहेको समस्यालाई सम्बोधन गर्ने माध्यमको रुपमा सदुपयोग गर्ने बताएका थिए ।
