भक्तपुर, १५ जेठ । भक्तपुर नगरपालिकाका नगर प्रमुख सुनिल प्रजापतिले धेरै व्याजको लोभमा पैसा जम्मा नगर्न सचेत गराएका छन्।
च्याम्हासिंहको समय बचत तथा ऋण सहकारी संस्थाको १२ औं स्थापना दिवस र नवनिर्वाचित जनप्रतिनिधिको बधाई तथा सम्मान कार्यक्रममा उनले भक्तपुरमा धेरै गैर समुदायमा आधारित सहकारी खुलेकोले धेरै व्याजको लोभमा पैसा जम्मा नगर्न आग्रह गरे ।
उनले भक्तपुरका नगरपालिकामा दर्ता नै नभएका बहुउद्देश्यीय सहकारी संस्थाहरु खुल्न थालेको बताउँदै ती सहकारीहरुलाई नगरपालिकाले निगरानी गरिरहेको उल्लेख गरे ।
सोही कार्यक्रममा उनले भक्तपुर नगरपालिकाले सञ्चालन गरिरहेको शैक्षिक संस्था देशभर नमूनाको रुपमा अगाडि बढेको बताउँदै सरसफाई तथा सम्पदा पूर्णनिर्माणमा पनि अगाडि बढेको बताए ।
उप प्रमुख रजनी जोशीले २०७४ को घोषणापत्र अनुसार काम गरेकोले अहिलेको निर्वाचनमा अत्यधिक बहुमतले जिताएको बताइन् ।
उनले सहकारी संस्था र नगरपालिका बीच हातेमालो गर्दै नगरबासीको सांस्कृतिक तथा आर्थिक पक्षलाई सबल बनाउनुपर्ने बताइन् ।
नव निर्वाचित वडा नं ८ का कुष्णप्रसाद कोजूले वडाबासीको लागि एम्बुलेन्स झैं सेवामा खटिने प्रतिबद्धता व्यक्त गरेका थिए ।
उक्त कार्यक्रममा ८ वडा निर्वाचन परिचालन समितिका संयोजक महेन्द्र खायमलीले जनताको कार्य गर्दा जनतालाई चित्त नदुखाई सर्वोपरी ठानेर काम गर्नुपर्ने बताए ।
सोही कार्यक्रममा भक्तपुर जिल्ला बचत तथा ऋण सहकारी संस्थाका अध्यक्ष कृष्ण गोविन्द लाखाजूले मल वितरणमा नगरपालिका भित्रका सहकारीलाई जम्मा ४०० बोरा छुट्याएकोले भक्तपुर नगरपालिकामा सहकारीले मल ल्याउन नसकेको बताए ।
उक्त कार्यक्रममा समय बचत तथा ऋण सहकारी संस्थाका अध्यक्ष श्याम सुन्दर बेकोजू, उपाध्यक्ष चन्द्रकृष्ण ग्वाछा, निवर्तमान अध्यक्ष बाबुकाजी गाइजूले पनि बोलेका थिए ।
