भक्तपुर, २ जेठ । भक्तपुरको चाँगुनारायणमा मतदान अधिकृतको सही नै नभएको मतपत्र भेटिएको छ ।
मत गणना जारी रहँदा चाँगुनारायण नगरपालिका वडा नं. ६ को मत गन्ने क्रममा एउटा मतपत्रमा मतदान अधिकृतको सही नै नएको मतपत्र भेटिएको हो ।
सही नै नभएको मतपत्र भेटिएपछि मतगणनामा केही समय अवरोध सिर्जना भएको निर्वाचन अधिकृत फन्डेश्वरी घिमिरेले बताइन् ।
‘एउटा मतपत्र मतदान अधिकृतको सही नै नभएको भेटिएको थियो’, उनले भनिन्, ‘सोही कारण मतगणनामा केही समय अवरोध भएको छ ।’
उनले सो विषयलाई अहिले समाधान गरिएको पनि जानकारी दिइन् । दलहरुले सो मतपत्रलाई पनि गणना गर्नुपर्ने माग राखेका थिए । तर, मतदान अधिकृतकै सही नभएको मतपत्र सदर नहुने भएपछि दलहरुले सहमति जनाएको उनको भनाइ छ ।
‘अहिले विवाद सकिएको छ, मतगणना सुचारु भएको छ’, उनले भनिन् । उनले वडा नं. ५ को मत गणना अन्तिम चरणमा पुगेको पनि बताइन् ।
