भक्तपुर, २५ चैत । सेवा निवृत समाज भक्तपुरले ६ जना शिक्षकलाई सम्मान गरेको छ । शुक्रबार समाजले ‘शैक्षिक अनुभब – १० विमोचन कार्यक्रममा ती शिक्षकहरुलाई सम्मान गरिएको हो ।
सम्मानित हुने सेवा शिक्षकहरुमा चन्द्रबहादुर गोसाई, सरोजकुमार दत्त, कृष्णभक्त जोशी, मथुरी शाखः, रत्नदेवी प्रजापति र शिवकुमार कर्माचार्य रहेका छन् । उनीहरुलाई बागमती प्रदेश सांसद सुरेन्द्रराज गोसाईले दोसल्ला ओढाउँदै सम्मान पत्रले सम्मान गरे ।
कार्यक्रममा सांसद गोसाईले शिक्षकलाई सम्मान नहुने समाजलाई उत्कृष्ट समाज भन्न नसकिने बताए । नेपाल सरकारले गर्नुपर्ने काम समाजले गरेको भन्दै उनले आयोजकप्रति आभार प्रकट गरे ।
आयोजक समाजका अध्यक्ष अम्विकामान मानन्धर, सचिव शेरबहादुर ङाखुसी, कोषाध्यक्ष विश्वराम कवां, संयुक्त परीक्षा समिति भक्तपुरका गणेशराम थुसा, सम्मानितहरुको तर्फबाट सरोजकुमार दत्त, सदस्य रत्नकेशरी कक्षपतिलगायतले २०७३ साल असार ९ गते स्थापित समाजमा हालसम्म जिल्लाका दुई सय २० जना सेवा निबृत शिक्षकहरु सदस्य रहिसकेको बताए ।
