भक्तपुर, २६ फागुन । विद्यालय शिक्षाको जगको रुपमा रहेको पूर्व प्राथमिक तह अर्थात् प्रिस्कुललाई प्रभावकारी, बालमैत्री र सिकाईमैत्री बनाउन नेशनल प्याब्सन भक्तपुरले कार्यक्रमको थालनी गरेको छ ।
नेशनल प्याब्सन भक्तपुरले आफ्ना सदस्य विद्यालयहरुको पूर्व प्राथमिक तह अर्थात प्रिस्कुल लेभल सुदृढ गर्ने उद्देश्यले ‘पूर्व प्राथमिक तह स्तरोन्नति २०७८’ कार्यक्रमको सुरुवात गरेको हो ।
आगामी २०७८ चैत्रबाट सदस्य विद्यालयरुमा सुरु गरिने उक्त कार्यक्रमबारे आज सूर्यविनायकको पलाँसेस्थित काठमाडौं फन भ्यालीमा आयोजना गरिएको अन्तरक्रियामा जानकारी दिइएको हो ।
त्यसका लागि नेशनल प्याब्सन भक्तपुर र फिनिक्स मन्टेश्वरी तालिम सेन्टर कुमारीपाटीबीच सहकार्य गर्ने सहमति भएको छ । सहमतिसँगै विद्यालयलाई मजबुत बनाउन फिनिक्स मन्टेश्वरीले शिक्षकहरुलाई तालिम दिने, अभिभावक शिक्षा सञ्चालन गर्ने र आवश्यक शैक्षिक परामर्श समेत दिने भएको छ ।
अन्तरक्रियामा नेशनल प्याब्सन भक्तपुरका अध्यक्ष सञ्जय खड्काले मन्टेश्वरीको बोर्ड र प्ले स्टेसन हुँदैमा राम्रो इसिडी तथा प्लेस्कुल नुहने भएकाले निरन्तर तालिम र शिक्षकहरुलाई पूनर्ताजगी प्रदान गरी शैक्षिक प्रवरद्र्धनका लागि फिनिक्स मन्टेश्वरीसँग सहकार्य गरिएको बताए ।
पूर्व प्राथमिक तहलाई बलियो बनाउने उपाय खोज्न र शिक्षालाई गुणस्तरीय बनाउन आयोजित अन्तरक्रियामा फिनिक्स मन्टेश्वरीकी संचालिका एवं प्रशिक्षकद्वय रीता घिमिरे तिमिल्सिना र रीता आचार्यले पूर्व प्राथमिक तहलाई स्तरोन्नति गर्नु आवश्यक रहेको बताउँदै सो तहमा रहेका विभिन्न समस्या पत्ता लगाएर समाधान गर्न सकेमात्र शिक्षाको जग बलियो हुनेमा जोड दिइन् ।
विभिन्न विद्यालय सञ्चालक तथा प्रिन्सिपलहरुले राखेको जिज्ञासको समाधान गर्दै उनीहरुले पूर्व प्राथमिक तहमा आएका नवीनतम् अभ्यास र आयामका सन्दर्भमा चर्चा गरेका थिए। प्रशिक्षकद्वयले बालबालिकालाई केन्द्रमा राखेर पठनपाठन गराउनु नै इसिडी, मन्टेश्वरी र ईसिईसिलगायतका विधि विकास भएको चर्चा गर्दै अभिभावक शिक्षालाई विद्यालयले जोड दिनुपर्ने आवश्यकता औंल्याइन् । उनीहरूले सिकाइका लागि क्रियाकलापमुखी शिक्षण विधि जरुरी रहेकाले विद्यालयको वातावरण र आवश्यकता अनुसार आफूहरुले सघाउने समेत बताइन्।
